Hvað eru dráttarvextir?

Dráttarvextir eru vextir sem kröfuhafi getur krafist þegar greiðsla berst ekki á réttum tíma. Þeir eiga til dæmis við um reikninga, leigu og aðrar peningakröfur sem greiðast eftir gjalddaga. Dráttarvextir eru hærri en venjulegir vextir og eiga bæði að bæta kröfuhafanum tjónið af seinkuninni og hvetja skuldara til að greiða á réttum tíma.

Hvernig eru dráttarvextir ákveðnir?

Um dráttarvexti gilda lög um vexti og verðtryggingu nr. 38/2001. Samkvæmt þeim byggjast dráttarvextir á vöxtum Seðlabanka Íslands, að viðbættu föstu álagi sem kveðið er á um í lögunum. Seðlabankinn reiknar og birtir dráttarvextina.

Þar sem dráttarvextir byggjast á vöxtum Seðlabankans hækka þeir og lækka í takt við stýrivexti. Þegar peningastefnunefnd breytir vöxtum má því búast við að dráttarvextir breytist í kjölfarið.

Hvenær reiknast dráttarvextir?

Meginreglan er sú að dráttarvextir reiknast frá gjalddaga kröfu þar til hún er greidd. Ef gjalddagi hefur ekki verið ákveðinn fyrir fram getur kröfuhafi krafist dráttarvaxta þegar liðinn er mánuður frá því að hann krafði skuldarann sannanlega um greiðslu. Nánari reglur eru í lögunum.

Dráttarvextir eru gefnir upp sem ársvextir og reiknast í hlutfalli við þann tíma sem greiðsla dregst. Ef 100.000 króna reikningur er greiddur tveimur mánuðum of seint og dráttarvextir eru 15% á ári nema dráttarvextirnir um 2.500 krónum (100.000 × 15% × 2/12). Við þá upphæð getur bæst innheimtukostnaður.

Dráttarvextir á M5

Á síðunni Hagtölur má sjá nýjustu dráttarvexti Seðlabankans á peningakröfum í íslenskum krónum, ásamt grafi sem sýnir þróun þeirra. Með því að bera þá saman við stýrivextina sést að dráttarvextir fylgja vöxtum bankans en liggja nokkrum prósentustigum ofar. Um kröfur í erlendum gjaldmiðlum gilda aðrir dráttarvextir.

Nánari upplýsingar er að finna á vef Seðlabankans um vexti.